ភ្នំពេញ៖ «ស្ពានឆ្លងទន្លេពីកោះពេជ្រ ទៅកោះនរា» ត្រូវបាននាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត អនុញ្ញាតបើកឱ្យប្រើប្រាស់ជាបណ្តោះអាសន្នចាប់ពីថ្ងៃទី២០ ខែតុលា ឆ្នាំ២០២៣ វេលាម៉ោង៦ព្រឹក ដើម្បីកាត់បន្ថយការកកស្ទះចរាចរនៅការដ្ឋានសាងសង់ស្ពានអាកាសព្រះមុនីវង្ស។ បើតាមការផ្សាយរបស់មន្ទីរសាធារណការ និងដឹកជញ្ជូនរាជធានីភ្នំពេញ។

ស្ពាននេះមានប្រវែង ៨៤៤ម ទទឹង ២៤,៥០ម មាន ២គន្លងរថយន្តទៅមក ១គន្លងទោចក្រយានយន្តទៅមក និង ១គន្លងថ្មើរជើងទៅមក ព្រមទាំងមានផ្លូវកាត់ក្រោមគល់ស្ពានស្របច្រាំងទន្លេកោះពេជ្រ និងច្រាំងទន្លេកោះនរាផងដែរ។

ស្ពានកោះនរានេះ ចាប់ផ្តើមបើកការដ្ឋានសាងសង់កាលពីទី២៦ ខែតុលា ឆ្នាំ២០២០ ក្រោមអធិបតីភាពអតីតនាយករដ្ឋមន្ត្រី សម្តេចតេជោ ហ៊ុន សែន។ ក្រោយបញ្ចប់សាងសង់ស្ពានមួយនេះ រាជរដ្ឋាភិបាលក៏គ្រោងសាងសង់ស្ពានឆ្លងទន្លេចំនួន២បន្ថែមទៀតនៅរាជធានីភ្នំពេញ គឺមានស្ពានមិត្តភាពកម្ពុជា-កូរ៉េ និងស្ពាននៅម្តុំចាក់អង្រែឆ្លងទៅព្រែកប្រា៕

^{PHOTO: POV}